فضـــاعيــني في رمـــضــان

السلام عليكم ورحمة الله وبركاته



هــذا هـــو اول صباح او اول فجرية لرمضان كل عام وانتو بخير ان شاء الله

وما احترت في موضوعي اليوم

لاني لقيته على طول في فمي

اللي هو


جغمة الموية



مدري ليش يعني الجغمة دي اللي راح تروي عطشنا في اليوم كله ؟؟ ولا ايش قصتها ؟؟

ولا ما يصير صيامنا الا بالجغمة دي ...؟؟

يعني جغمة سحرية راح ترطب لسانـنا ؟؟

يعني خلاص انا عندي توقع انه الاب يسال ولده في الظهر : شربت جغمة ياواد ؟؟

يقوله ايوة يا ابويا .. اجل كيف اصوم ؟
احسبك ماشربتها وفطرت ..!!

خلاص وتصير من اركان الصيام

صوم اللسان عن السب*
صوم الروح عن الفسوق *
شرب جغمة قبل الآذان *


المصيبة انه احنا نصوم في ايام غير رمضان

ونصبر من غير جغمة

وبناكل من غير ما نقضي بالهبل

وان شاء اله نفس الاجر ..!!!

يعني مدري ايش قصة هذه الجغمة الرمضانية ..؟؟؟



على فكرة صح انا اتكلم بصفتي ممن يشربون هذه الجغمة

لكني والله لست منهم

وما عمري جريت على البرادة قبل الاذان

ولا اثناء ما يأذن



والحمد لله الذي بلغنا رمضان

نســألك اللهم اتم علينا هذا الشهر

في طاعتك ومرضاك

وصلى الله على سيدنا محمد وعلى آله وصحبه وسلم







ـــــــــــــــــــــــــــــــــــــــــ محبتي ــــــــــــــــــــــــــــــــــــ

السلام عليكم ورحمة الله وبركاتة




عساكم بخير


اليوم انا شايفة الموضوع يا برستيج ..

.....!!!

عارفين ايش برستيج ..؟؟


اللي اعرفه واللي اقصده وناوية اتكلم عنه

البرستيج اللي هو المظهر

او المكانه بين الناس والمجتمع

اعطيني برستيجي .. يعني اعطيني مقامي ومكانتي

طيب مين اللي يسوي البرستيج دا ؟؟

الشخص نفسه ولا المتعاملين معاه ؟؟

طيب نجي لشخصية مرموقه

ولها برستيجها في العالم الانساني والوظيفي

جات تتعامل مع ناس .. مالها كبير

يعني ما عليها مين قدامها

يعني ممكن يتناقش مع ام برستيج دي ويقولها انتي حمارة ما تفهمي

صح ؟؟؟ تصير ؟؟ صح ؟؟

فين راح برستيج الاخت ...؟؟

اذا ماله فايدة البرستيج وسط عالم مو داري وين الله حاطه فيه

طيب لو سوينا العكس ؟؟

يعني شخصية مالها اي قيمة

وصلت في يد ناس .. واااو برستيج

فطورهم وغداهم برستيج .. !!

كيف يتعاملوا مع الشخصية دي ...!!

انا اقولكم

ما راح يتعاملو معاها .. لأن برستيجهم ما يسمح ...!!

طيب والفايدة ..

....؟


الفايدة انا اقولها ...

بلا برستيج بلا بطيخ

الرسول صلى الله عليه وسلم .. كان يتعامل مع كل الطبقات

لأنه كان يعامل الناس على قدر عقولها

ولنا في رسول الله القدوة الحسنة ..

يعني مو معقول اقعد مع ناس بسطاء

واكلمهم .. في ماركات .. واماكن راقيه

واتكلم انجلش وفرنسواا وتشاووو

يعني لو اقولهم تشاووو مو بعيد يقولوا رحمك الله

ونفس الوقت مو معقول اقعد مع ناس برستيج واقعد اقولهم

محلات ابو عشرة جابت بضايع تجنن

...؟؟؟؟

الله اعطى لكل انسان شخصية والتجارب

والتعليم والحياة قامت بنحت الشخصية وتكوينها

هناك من شوهـه علـمه .. فاصابه الغرور

وهناك من احرقه ماله .. فاصابه الطمع

وهناك من نكبته هموم الحياة .. فاصابه الحزن والكآبه


ما يحزنني ... هو جهد بعض الناس .. لخلق برستيج

لا يناسبهم ابد

بالمفتشر .. تجيك الوحدة مسوية انا التي مافي مثلي لتي

وهي من جنب اللاتي


ههههههههههههههههههه


وعسى الله يكون انفهمت المرة دي

معليش الموضوع تقيل .. وماله نهاية


بس اعطيتكم عنه لمحه ..


واترك الزوووم عليكم وعلى فطانتكم



واستودعكم الله

واللهم صلي وسلم وبارك على سيدنا محمد وعلى آله وصحبه وسلم








ــــــــــــــــــــــــــــــــــــــــــــــــــــ محبتي ــــــــــــــــــــــــــــــــــــــــــــ

السلام عليكم ورحمة الله وبركاته




عن أبي هريرة قال : قال رسول الله صلى الله عليه وسلم (إذا كان أول ليلة من شهر رمضان صفدت الشياطين ومردة الجن وغلقت أبواب النار فلم يفتح منها باب وفتحت أبواب الجنة فلم يغلق منها باب وينادي مناد يا باغي الخير أقبل ويا باغي الشر أقصر ولله عتقاء من النار وذلك كل ليلة
اخرجه الترمذي


هذا اللي اعرفه واللي درسته


سؤالي .. مو فين ربي حبسهم لا ..؟؟

سؤالي ..؟؟

كيف محبوسين .. واحنا بنسوي معاصي ؟؟

كيف وانا اصلي .. القى نفسي في مكان ثاني غير صلاتي ؟؟


هذا اللي خلاني اسأل

مين الشيطان في رمضان ؟؟


طبعا .. لا اشكك في الحديث .. واكيد ان الشياطين

محبوسة بأمر من الله .. !!


اذا نحن شياطين انفسنا ... !!

النفس الامارة بالسوء ..

او النفس المتعودة على المعصية ..

يعني اللي يسمع اغاني في رمضان خاصة

مو شيطان وسوس له .. ؟؟

نفسه المتعودة على الاغاني هي اللي خلته يسمع ؟


عن جد هذا خلاني افكر كثير .. ليش لما نقول اعوذ بالله من الشيطان الرجيم

في أمر ما .. فوق كذا نسويه ..؟؟

لأن الشيطان اصلا ماله دخل ..؟

احنا المفروض نقول اعوذ بالله من النفس الامارة بالسوء ..


انا اشوف نفسنا هي اقوى .. وادهى وأمـر


الشيطان ضعيف .. قليل الحيلة على المؤمن القوي


لذلك كانت مقاومة النفس .. هي من مراتب الجهاد

لأنها عدو منك وفيك ..

صعب تكتشفه ..

...!!


اللهم قويني على نفسي الامارة بالسوء

وقربني لكل ما يقربني للجنه

وابعدني عن كل ما يقربني للنار

برحمتك ياارحم الراحمين




والصلاة والسلام على اشرف الانبياء والمرسلين سيدنا محمد
وعلى آله وصحبه اجمعين








ــــــــــــــــــــــــــــــــ محبتي ـــــــــــــــــــــــــــــــــ